Nënkryetarja e Komunës së Prishtinës, njëherit u.d. së drejtoreshës së Arsimit, Jehona Lushaku, ka bërë të ditur se greva e punëtorëve teknikë është ndërprerë, pasi që iu janë rritur pagat.
Lushaku thotë se me rritjen e pagave për punëtorët teknikë mundësohet që shkollat të funksionojnë normalisht dhe të sigurohet një mjedis i pastër për nxënësit e kryeqytetit.
“Sot, me urgjencë kam trajtuar kërkesat e punëtorëve teknikë të institucioneve shkollore në kryeqytet dhe kam zhvilluar diskutime të brendshme për veprimet e mundshme. Me këtë rast, kam ftuar në takim kryetarin e Sindikatës së tyre, z. Jusuf Azemi, me të cilin kemi diskutuar rreth kërkesës për rritje pagash”, ka shkruar ajo në Facebook.
Sipas saj, kjo rritje e pagave është një përgjigje konkrete ndaj punëtorëve teknikë, dhe një shprehje e vlerësimit të punës së tyre.
“Dëshiroj po ashtu, të shpreh falënderim të veçantë për të gjithë punëtorët për durimin dhe angazhimin e tyre për mirëmbajtjen e ambienteve shkollore. Kjo marrëveshje shënon një moment kyç në përmirësimin e dialogut social dhe në forcimin e bashkëpunimit ndërmjet qeverisjes lokale dhe punëtorëve”, ka shkruar ajo mes tjerash./teve1.info/
