Takimin e fundit përballë Kurti e Vuçiq e bënë në shtator të vitit 2023 në Bruksel.
E nga ajo kohë, kryeministri i Kosovës, Albin Kurti dhe presidenti i Serbisë, Aleksandër Vuciq, nuk e kanë parë sy më sy njëri-tjetrin.
Por dhe pas pesë muajve, nuk ka ndonjë datë se kur do të zhvillojnë takimin e radhës.
Bashkimi Evropian ani pse nuk ka një ditë të caktuar për takim të mundshëm mes palëve nuk frikësohet se do të ketë ngërç në dialogun.
“Dialogu vazhdon. Ne jemi duke punuar, dhe vazhdojmë të punojmë që ky proces të ecë përpara, tu ndihmojmë palëve që më në fund të fillojnë të sillen në mënyrë konstruktive, që të mund të ecin përpara. Nuk kemi frikë se do të ketë një status quo të re, ose një ngërç. Në fakt nuk frikësohemi nga asgjë, por vetëm për atë se populli i Kosovës dhe Serbisë, do të mbeten jashtë nga ajo që parashihet për ta në nga Procesi i Anëtarësimit, nga fakti se ne po i shohim të gjitha ato që ju po i përmendni në pyetjen tuaj, e për të cilat ne kemi reaguar gjatë javëve të fundit. Në veçanti në anën e Kosovës, me vendimet e njëanshme, dhe gjëra që kanë ngritur shqetësime, bashkë me mënyrën se si komunikohet nga ana e autoriteteve të Prishtinës. Këto krijojnë frikë tek ne, se Kosova mund të mbetet jashtë dhe të mbetet prapa”, ka thënë për Tëvë 1, zëdhënësi i BE-së, Peter Stano.
Mirëpo, njohësi i politikës, Fidan Ukaj mendon që zhvillimet e fundit rreth dinarit dhe mbylljes së strukturave paralele e kanë pamundësuar edhe më shumë këtë takim.
Madje Ukaj nuk beson që Qeveria e Kosovës do të marrë pjesë në një takim trepalësh pa një raport hetimor për rastin e Banjskës.
Tëvë1 ka dërguar pyetje edhe në Qeverinë e Kosovës rreth kësaj çështje, mirëpo të njëjtit gjatë ditës nuk kanë kthyer përgjigje.
