E kryeministri i Kosovës, Albin Kurti javën e ka filluar me një takim me të gjithë ambasadorët e vendeve të akredituara në Kosovë. Këtë takim, i pari i Qeverisë e ka ftuar për të diskutuar rreth rregullores së Bankës Qendrore të Kosovës për ndalimin e përdorimit të dinarit serb. Pas këtij takimi foli ambasadori amerikan në Kosovë, Jeffry Hovenier, ku përsëriti kërkesën e SHBA-së për shtyrje të këtij vendimi.
Veturat e tyre po qëndrojnë para Qeverisë së Kosovës.
E të gjithë ambasadorët e akredituar në Kosovë i bëri bashkë vendimi i Bankës Qendrore të Kosovës për ndalimin e përdorimit të dinarit serb.
Për të folur për këtë temë, diplomatët u ftuan prej shefit të ekzekutivit, Albin Kurti.
E për çështjen e dinarit, ambasadori amerikan në Kosovë, Jeffry Hovenier thirri konferencë për media pas takimit.
Ai përsëriti kërkesën e Shteteve të Bashkuara të Amerikës për shtyrje të këtij vendimi.
“Unë po e lë Qeverinë të rikonsederojë se si do të implementojë këtë Rregullore. Unë mund të them që kërkesë e SHBA-së është që kjo të shtyhet. Ka shumë punë për t’u bërë deri në implementimin e saj. Qeveria ka folur për një periudhë transicioni dhe ne shpresojmë që ky transicion t’i marrë parasysh shqetësimet për këtë çështje. Ne besojmë që Qeveria do të jetë partner i joni në këtë çështje. Nëse ajo vendos ndryshe atëherë kjo do të ketë ndikim në kualitetin e partneritetit tonë”, u shpreh Hovenier.
Për takimin e së hënës, Zyra e Kryeministrit njoftoi përmes komunikatës.
Për çështjen e dinarit foli edhe zëdhënësi i Bashkimit Evropian, Peter Stano në konferencën javore.
Sipas tij, këto veprime nuk po kontribuojnë në de-eskalim të situatës dhe mund të kenë ndikim negativ te njerëzit.
“Këta hapa janë shqetësues sepse nuk po kontribuojnë në përmirësimin e situatës, zakonisht nuk janë të koordinuar, janë të njëanshëm ose ndërmerren pa një nivel të nevojshëm konsultimi paraprak për të parandaluar ndikimin negativ që mund ta kenë te njerëzit. Prandaj është e rëndësishme të kthehen në dialog”, deklaroi zëdhënësi i BE-së, Peter Stano.
Ai më tej tregoi që aktualisht nuk ka takim të caktuar në nivelin e lartë në Bruksel, por janë duke punuar në këtë drejtim.
