Afër 120 punëtorë të sektorit privat që kryejnë shërbime në shkollat e Prishtinës, të hënën filluan grevën. Kjo për shkak të pakënaqësive që kanë me pagën prej 250 eurove. E dallimi me të sektorit publik për punën e njëjtë është 170 euro.
Shishe plastike e qese bërlloku po zënë vend në oborrin e shkollës ‘’Abdyl Frashëri’’ në Prishtinë.
Por ato tashmë nuk do të largohen nga vendi ku janë hedhur.
Kjo pasi shërbimet e punëtorëve teknikë të shkollës nuk do të kryhen për një javë rresht.
Pasi këta filluan grevën, si pakënaqësi ndaj pagave të ulëta.
E paga e tyre është 250 euro.
“Qe 10 vite jam këtu, çudi për rroga, s’di njeri çka bon, shumë palidhje, rroga ma të dobëta s’di qysh”, tha punonjësja Selvete Pacolli.
Ndërsa dallimi mes punëtorëve teknikë të sektorit privat dhe atyre publik që paguhen për të njëjtën punë është 170 euro.
Prandaj grevën synojnë ta vazhdojnë deri në rritjen e pagave.
“Na grevën kemi me vazhdu deri t’na bohet ni zgjidhje, kjo është në fakt diskriminim i madh kundrejt punëtorëve, me bo dallime te punëtorët – edhe të njejtën punë e bëjmë në të njejtin vend”, u shpreh punonjësja teknike, Nexhmie Hajdari.
E grevën po e vazhdojnë edhe punëtorët teknikë në shkollën ‘’Hoxhë Kadri Prishtina’’.
Feim Bislimi, i cili tash e 20 vjet punon si punëtor teknik, e ka të vështirë të sigurojë nevojat familjare me pagën prej 250 eurosh.
“Nëse Kuvendi Komunal i Prishtinës e sheh të arsyeshëm që 1200-1300 nxënësa me 70-80 profesora me i lënë në mbeturina të mbajnë mësim, ata le të vazhdojnë. Nuk mund t’ja dalim as 2 javë me këto pare”, tha punonjësi, Feim Bislimi.
Për të njëjtën arsye, grevën po e mban edhe Melihate Makolli.
“Tek janë vështirësitë, na po e mbajmë grevën. Është jeta e vështirë”, tha punonjës, Melihate Makolli.
E grevën e punëtorëve të kësaj shkolle po e përkrahë edhe drejtoresha, Teuta Govori.
“Na len shumë keq kjo puna e tyre që janë në grevë të mos kënaqjes nga paga që e kanë, 250 euro duke e ditë që të gjitha çmimet janë shtrejtu. Unë i përkrahi, kanë plotësisht të drejtë”, u shpreh drejtoresha e shkollës “Hxhë Kadri Prishtina” Teuta Govori.
Ndërsa nga kompanitë private janë afër 120 punëtorë që kryejnë shërbime për komunën e Prishtinës.
Ndërsa nga Sindikata e Punëtorëve të Sektorit Privat paralajmëruan edhe për lirim të vendeve të punës.
“Drejtoresha e Arsimit paguhet për qita, nuk guxon me i bo këto diskriminime, e kemi paralajmëru më shumë se një vit për këtë çështje dhe ka premtuar sot neser, pastaj ne nuk kemi pritje të pafundshme, dhe tani ka ardhë fundi që kjo javë do të jetë kështu, do të jenë punëtorët në grevë, nuk do t’i kryejnë shërbimet e veta dhe javën tjetër do t’i lirojnë vendet e punës duke iu thënë lamtumirë nxënësve dhe gjithë tjerëve”, u shpreh kryetari i Sindikatës së punonjësve privat në Kosovë, Jusuf Azemi.
Tëvë1 kërkoi nga Komuna e Prishtinës një qëndrim për këtë çështje, mirëpo të njëjtën nuk iu përgjigjën kërkesës së televizionit.
