Zëvendëskryeministri i Kosovës, Besnik Bislimi ka thënë se Gjykatat në Kosovë janë të pavarura nga Qeveria.
Ai tha se deklarimet publike në lidhje me vendimet e gjykatave, kanë të bëjë me ndërhyrjet që sipas tij, bëhen nga jashtë.
Tutje, Bislimi tha se Gjykatat duhet të vendosin vet dhe të mos ketë asnjë ndërhyrje nga jashtë, qoftë nga brenda Kosovës, qoftë nga jashtë saj.
“Pyetja që duhet të bëni ju është: Sa janë të pavarura gjykatat? Është shumë e qartë se gjykatat në Kosovë janë të pavarura nga Qeveria. Por, a janë të pavarura? Në qoftë se jo, pyetja që duhet të shtoni është se nga kush janë të varura. Kush i ndikon vendimet që i marrin gjykatat? Në qoftë se e kritikoj unë një vendim është bash, pse e kritikojë që nuk është i pavarur ai. Sepse duhet të bëhet që gjykatësi të vendos vetëm në bazë të elementeve, pa ndërhyrje nga jashtë. Qoftë kjo brenda Kosovës, ose jashtë saj”, ka deklaruar ai.
Bislimi i është përgjigjur edhe Bashkimit Evropian, duke thënë se Kushtetuta ose duhet të zbatohet në tërësi ose të mos zbatohet.
“Kushtetuta ose duhet të zbatohet në tërësi ose të mos zbatohet. Në njërin vendim të ketë insistim të BE-së që Kushtetua të zbatohet tërësisht, siç është rasti për Manastirin e Deçanit dhe nenin 11 që thotë ka vetëm një monedhë në qarkullim në Kosovë, të njëjtin miq të thonë këtë mos e zbatoni. Kushtetuta ose është e shenjtë dhe duhet të zbatohet, ose pastaj bëjmë “pick a cherry”. Nëse duhet bërë “pick a cherry” e bëjmë ne, por nëse zbatohet, insistoni që të zbatohet në të gjitha rastet”, ka thënë ai./teve1.info
