Ambasadori i BE-së në Kosovë, Tomas Szunyog, ka takuar të martën kryetarin e Komisionit Qendror të Zgjedhjeve, Kreshnik Radoniqi.
Përmes një postimi në rrjetin social “X”, Szunyog ka bërë të ditur se gjatë takimit kanë diskutuar për procesin e shkarkimit të kryetarëve në komunat veriore, përcjell teve1.info.
“Diskutoi procesin e tërheqjes së kryebashkiakëve në komunat veriore me kryesuesin e KQZ-së. Ndërsa e përgëzova për përgjigjen e shpejtë ndaj kërkesave të Grupeve Nismëtare, u interesova për hapat e ardhshëm dhe përgatitjet e brendshme të KQZ-së për votën e tërheqjes nëse kalohet pragu i 20%”, thuhet në postimin e Szunyog.
Ndërsa, në komunikatën e KQZ-së thuhet se Radoniqi njoftoi ambasadorin Szunyog lidhur me angazhimin aktual të KQZ-së për harmonizimim e Rregulloreve Zgjedhore dhe Rregulloreve të Brendshme me Ligjin për Zgjedhjet e Përgjithshme.
Komisioni Qendror i Zgjedhjeve (KQZ), ka njoftuar se ka pranuar peticionin për shkarkimin e kryetarit të Zubin-Potokut, Izmir Zeqiri dhe se bazuar në legjislacionin në fuqi do t’i verifikojë nënshkrimet.
Mbledhja e nënshkrimeve në këtë komunë ka nisur më 9 janar.
Nënshkrimet për shkarkimin e kryetarëve në veri janë mbledhur edhe në tri komunat tjera, Mitrovicë e Veriut, Leposaviq e Zveçan.
