Rruga “Drenica” në Podujevë ishte lokacioni ku u rrah për vdekje Lulzim Fejzullahu.
Dosja e Prokurorisë zbuloi që 18 vjeçari u godit me veturë nga dy të mitur, pastaj u godit me shkop.
Por në raportin e Policisë së Kosovës u tha se Fejzullahu është therrur me thikë ditën e 15 janarit.
“Janë arrestuar dy të dyshuar meshkuj kosovarë pasi që, të njëjtit kanë therrur me thikë viktimën mashkull kosovar. Viktima ka pranuar tretman mjekësor në QKMF Podujevë dhe më pas është dërguar për në QKUK Prishtinë. Njësiti policor në vendin e ngjarjes ka konfiskuar një thikë dhe një veturë. Me vendim të prokurorit dy të dyshuarit dërgohen në mbajtje”, thuhej në raport.
Por i ndjeri nuk kishte në trupin e tij shenja të therjes me thikë.
Këtë e konfirmoj, shefi i Intensives në Qendrën Klinike Universitare të Kosovës, Shaqir Uka.
Për këtë çështje ekipi i tëvë1 pyeti edhe Drejtorin e Policisë në Komunën e Podujevës, Nijazi Jasharin.
Por i njëjti nuk u përgjigj.
E për këtë ngjarje të vrasjes së 18 vjecarit, Inspektorati Policor i Kosovës konfirmon se kanë filluar hetimet.
“Duke ju referuar kërkesës suaj ju informojmë se lidhur me këtë rast Inspektorati Policor i Kosovës sipas detyrës zyrtare ka filluar një hetim preliminar që përfshin prëveç tjerash edhe grumbullimin e informacioneve shtesë rreth veprimeve të policisë si dhe sigurimin e të gjitha shkresave lidhur me këtë rast. Veprimet tjera do të ndërmerren varësisht nga të gjeturat e hetimit preliminar dhe autorizimeve ligjore të IPK-së”, thuhet nga IPK.
Lulzim Fejzullahu u varros të dielën në varrezat e qytetit në Podujevë.
Familja e të ndjerit ka kërkuar drejtësi për 18 vjeçarin.