Në reagimin e tyre AGK-ja ka thënë se Ramush Haradinaj ka sulmuar sot mediat në Kosovë dhe Shqipëri duke i quajtur “mercenarë” dhe “të shitur”, pas pretendimeve të tij se ato kanë raportuar se mund të konsiderohet si kandidat për President të Shqipërisë.
“Kryetari i AAK-së njëherësh deputeti, Ramush Haradinaj, ka sulmuar sot mediat në Shqipëri dhe Kosovë duke i quajtur ‘mercenarë’ dhe ‘të shitur’, pas pretendimeve të tij se ato kanë raportuar se mund të konsiderohet si kandidat për President të Shqipërisë. Për më tepër, Haradinaj i ka akuzuar mediat se punojnë “kundër interesave të Shqipërisë dhe Kosovës”, thuhet në reagim.
Sipas AGK-së, një gjuhë e tillë është kërcenuese, denigruese e papranueshme që rrezikon sigurinë e gazetarëve.
Ata kanë ftuar Haradinaj dhe të gjithë akterët politikë që ankesat e tyre për raportimet t’i drejtojnë në organet vetërregulluese.
“AGK-ja e fton zotin Haradinaj dhe të gjithë akterët politikë që ankesat e tyre për raportimet t’i drejtojnë në organet vetërregulluese, dhe të përmbahen nga gjuha fyese dhe kërcënuese”, thuhet më tej në reagim. /teve1.info/
