Skuadra e Pep Guardiolës kryeson me 70 pikë, por Liverpooli, që ndodhet në formë të shkëlqyer dhe vjen pas 10 fitoresh radhazi në kampionat, numëron vetëm një pikë më pak dhe dëshiron të kompletojë përmbysjen e madhe ndaj kampionëve në fuqi.
Mesfushori i “Cityzens”, Ilkay Gundogan është në dijeni të rëndësisë dhe vështirësisë së këtij dueli. Në prononcimin për Tivibu Spor, 31-vjeçari vlerëson “The Reds” dhe këshillon shokët e tij. “Për momentin Liverpool është ndër skuadrat më të forta në planet, ata kanë arritur një formë të pabesueshme.
Do të jetë shumë e vështirë ndeshja kundër tyre. Ne duam t’i mposhtim ata në shtëpinë tonë, por e dimë se do të jetë një ndeshje mes dy skuadrave të barabarta. Nuk duhet të bëjmë asnjë gabim në këtë ndeshje.
Liverpool është një ekip shumë efektiv në kundërsulm, ndërsa ne jemi një ekip që i pëlqen të luajë me topin. Duhet të tregohemi të kujdesshëm. Nëse i lejojmë ta kthejnë lojën në favor të tyre, ata mund të na ndëshkojnë për gabimet tona”, deklaroi mesfushori gjerman, autor i 8 golave dhe 6 asisteve sezonalë.
