Avokati serb Çedomir Stojkoviq, pasi ka bërë homazhe në Prekaz dhe ka vënë lule te varri i Blerina Jasharit, është prononcuar për medie duke thënë se edhe 25 vjet pas luftës në Kosovë, Serbia arreston dhe rrah njerëz që duan pajtim mes kombeve.
Me tej Stojkoviq ka theksuar se veprimet e tilla, janë sinjal i qartë se e keqja nuk është mposhtur dhe se po pret momentin që të zgjohet sërish.
“25 vjet pas luftës në Kosovë, si lufta e fundit në Ballkan, vendi im arreston dhe rrah njerëzit që vënë lule në varret e fëmijëve shqiptarë të vrarë dhe duan pajtim mes kombeve. Kjo është një shenjë që s’guxojmë të injorojmë, është paralajmërim i qartë se e keqja nuk është mposhtur dhe se po pret momentin që të zgjohet sërish. Kjo e keqe tash po punon që ta vrasë shpresën se është e mundur e ardhmja e jonë e përbashkët kualitative”, është shprehur ai.
Po ashtu, avokati serb ka thënë se shteti i tij mund ta arresoj pas homazheve, por që sipas tij i arrestuar apo jo, ai do të jetë prap i lirë, pasi që liria siç thotë ai vjen nga zemra.
“Nëse shteti im arrestoi dhe rrahu Nikola Sanduloviqin për shkak se vuri lule në këtë vend i vetëdijshëm dhe me vlerësimin e tij, tash shteti im ka mundësinë të më arrestoj mua po ashtu dhe t’i tregojë botës se ka një rregull të ri, sipas së cilit nëse vendosni lule të pajtimit në varre të kombësive tjera, është e ndëshkueshme me burgim. Nëse nuk ndodh, atëherë duhet t’i shpjegojnë botës pse lulet e mia janë ndryshe nga ato të Nikolas, apo lulet e gjithë tjerëve, dhe pse jam përjashtim që nuk arrestohem. Pavarësisht nëse i arrestuar apo jo, unë prapë do të jem njeri i lirë, siç janë shumë, pasi liria nuk vjen nga një gjykim, e as burgu nuk vjen nga hekurat e qelisë. Liria vjen nga zemra e njeriut”, ka shtuar ai.
