Kryeministri i Kosovës, Albin Kuri, gjatë homazheve në Kompleksin Memorial në Reçak tha se masakra që ka ndodhur 25 vite më parë ka tronditur opinionin publik ndërkombëtar si dhe diplomacinë botërore.
Kurti tha se ndërhyra ushtarake e NATO-s ishte e domosdoshme për ta ndaluar gjenocidin e Serbisë në Kosovë.
“Masakra e Reçakut, këtu e 25 vite më parë kur u vranë 45 civilë shqiptarë e tronditi si opinionin publik ndërkombëtar, gjithashtu edhe diplomacinë botërore dhe e bëri të domosdoshëm ndërhyrjen ushtarake të NATO-s për ta ndalur gjenocidin e Serbisë në Kosovë”, tha ai para gazetarëv.
Kurti tha se ambasadori William Wolker tash e 25 vite vazhdon të jetë ndërkombëtari më i urryer në Serbi veç pse ka treguar të vërtetën e masakrës që ka ndodhur më 15 janar në Reçak.
“Kur ndodhi Masakra e Reçakut, ambasadori William Wolker si udhëheqës i OSBE-së në Kosovë erdhi këtu tek fshatarët dhe e foli të vërtetën. Tha se kjo është masakër dhe është krim kundër njerëzimit, e dihet që vërteta është armiku më i madh i diktatorëve dhe shovinistëve, andaj edhe kësaj e asaj dite Wolker vazhdon të jetë ndërkombëtari më i sulmuar dhe më i urryer në Serbi, ku vazhdon të dominojë një regjim autoritar me ç’rast ish-ministri i informatave të asaj kohe sot është president i Serbisë”, tha ai, raporton teve1.info.
Kurti përkujtoi masakrën, duke thënë se varrimi i 45 civilëve ka ndodhur katër javë më vonë, pasi që ka pasur luftime të mëdha.
“Më 15 janar në një dimër jashtëzakonisht të ftohtë pati ndodhur ky krim makabër, ndërkaq varrimi i 45 civilëve ka ndodhur vetëm katër javë më vonë sepse ka pasur luftë të madhe për Kosovën. I kemi edhe 11 ushtarë të UÇK-së që kanë rënë në betejë për mbrojtjen e trupave të masakruar nga Serbia dhe ato katër javë tregojnë se Serbia është përpjekur ta deformojë të vërtetën, ta justifikojë krimin dhe prandaj edhe një herë po e theksoj rëndësinë e të vërtetës të ambasadorit William Walker, të cilit i jemi mirënjohës që në një moment historik për popullin tonë e foli vetëm të vërtetën”, ka thënë ai.
Për fund, kryeministri i vendit falënderoi “përjetë ambasadorin Walker”.
“Ambasadorit Walker ne i jemi përjetë falënderues dhe mirënjohës, për shkak se në një moment vendimtar – historik për popullin tonë e foli të vërtetën dhe vetëm të vërtetën”./teve1.info/
