Kryetari i Aleancës për Ardhmërinë e Kosovës (AAK), Ramush Haradinaj ka reaguar pas shpërthimit të bombolës së gazit në Kçiq të Mitrovicës, që për pasojë u lënduar 13 persona të së njëjtës familje.
Haradinaj u ka uruar shërim të shpejtë të lënduarve.
“Lutjet tona janë për të prekurit dhe të plagosurit e shpërthimit të një bombole gazi që ndodhi sot në Kçiq të Mitrovicës. Ndajmë shqetësimin me familjarët dhe i urojmë shërim të shpejtë të gjithë të lënduarve! Qoftë ky rasti i fundit!”, ka shkruar Haradinaj në llogarinë e tij në Facebook.
Shërbimi Spitalor Klinik dhe Universitar (ShSKUK) ka bërë të ditur se pacientët kanë pësuar djegie të shkallës së dytë dhe të tretë, në gjymtyrë të ndryshme të trupit, përfshirë, fytyrë, duar, këmbë dhe pjesë të tjera të trupit.
Ndërkaq, katër pacientë si pasojë e plagëve të rënda janë futur në sallën e operacionit.
“Ekipi emergjent në përbërje të mjekëve specialistë të profileve të ndryshme dhe infermierëve po trajton që të trembëdhjetë pacientët”, thuhet në njoftim.
Lajmin e ka konfirmuar edhe zëdhënësi i Policisë së Kosovës për rajonin e Mitrovicës, Avni Zahiti.
“Rreth orës 16:30, policia ka pranuar informatë se si pasoj e një shpërthimi në një shtëpi në fshatin Kçiq të Mitrovicës, 13 persona kanë pësuar lëndime, të lënduarit janë dërguar për tretman mjekësor në Spitalin Rajonal të Mitrovicës”, ka thënë Zahiti.
Sipas zëdhënësit policor, bazuar në informatat e para dyshohet se shpërthimi ka ndodhur nga një bombolë gazi./teve1.info/
