Organizata e Veteranëve të Luftës së Ushtrisë Çlirimtare të Kosovës thotë që arrestimi i veteranëve të UÇK-së në Serbi po bëhet qëllimshëm për të njollosur luftën në Kosovë. Andaj ata kërkojnë që shteti ta shprehë këtë problematikë edhe para faktorit ndërkombëtar. Teksa njohësit e fushës juridike thonë se nuk mund të arrihet një marrëveshje politike për një gjë të tillë
Veterani i UÇK-së, Hasan Dakaj ndodhet në paraburgim në Beograd.
Autoritet serbe i kanë caktuar atij 30 ditë paraburgim.
Dakaj u arrestua të premten kur kaloi pikën kufitare në Merdare.
Njëjtë si Dakaj janë arrestuar edhe tjerë ish-ushtarë të Ushtrisë Çlirimtare të Kosovës në të kaluarën nga shteti serb.
Nezir Mehmetaj po qëndron në burgjet e Serbisë tash e katër vite, ku nga autoritetet serbe po pretendohet se ky i fundit ka kryer krime lufte.
E gjithë këto arrestime të tyre, nga OVL UÇK thonë se kanë qëllim të njollosin luftën e drejt të Kosovës.
Nënkryetari i kësaj organizate, Xhavit Jashari thotë se këtë çështje, institucionet e Kosovës do duhej ta adresonin edhe në mekanizma ndërkombëtarë, por edhe në tryezën e dialogut në Bruksel.
E sipas avokatit, Arbër Jashari arrestime të tilla po bëhen nga Serbia si shenjë hakmarrjeje ndaj luftës së fundit në Kosovë.
Ai thotë se nuk ekziston mundësia që të bëhet marrëveshje për mos-arrestimin e këtyre personave, për shkak se vlerëson se edhe Kosova do duhej ta bënte një gjë të tillë.
Tëvë 1 ka tentuar të marrë një përgjigje nga Ministria e Punëve të Jashtme dhe Diasporës por edhe ajo nga ajo e Drejtësisë, se a kanë ndonjë komunikim me autoritetet serbe rreth këtyre rasteve, por që deri në publikimin e kronikës nuk ka pasur përgjigje.
