Pas tërmetit vdekjeprurës në Japoni, banorët të cilët humbën shtëpitë dhe bizneset e tyre po përballen me vështirësi ekonomike.
Katër ditë pasi një tërmet me magnitudë 7.6 goditi prefekturën Ishikava dhe bregun perëndimor të Japonisë, vendasit janë të shqetësuar për rimëkëmbjen ekonomike në vend.
Masakatsu Nakaura, pronar i një dyqani ëmbëlsirash tradicionale japoneze,të premten shpërndau puding falas për banorët dhe të evakuuarit.
Por ndërsa ekonomia është e ulët veçanërisht pas pandemisë, Nakaura është i shqetësuar për sigurinë e së ardhmes së biznesit të tij pas dëmeve të shkaktuara nga tërmeti.
“Dëgjuam disa njerëz që thoshin se ushqimi po mbaronte. Ekonomia është rraskapitur, veçanërisht pas pandemisë. Situata do të jetë shumë e pasigurt për të ardhmen e bizneseve. Me një fatkeqësi të kësaj përmase do të duhet një kohë e gjatë për t’u rikuperuar dhe do të jetë shumë e vështirë për ne”, shprehet ai.
Dhjetëra mijëra banorë janë ende pa energji dhe ujë, ndërsa qindra mbeten të izoluar nga ndihma për shkak të rrëshqitjeve të dheut dhe rrugëve të bllokuara në Japoni.
Mijëra trupa japoneze i janë bashkuar përpjekjeve për të arritur në pikat më të goditura në Gadishullin Noto, e cila ishte qendra e tërmetit.
Ekipet e shpëtimit në Japoni po nxitojnë për të gjetur 242 persona të zhdukur pas tërmetit vdekjeprurës i cili vrau të paktën 92 persona.
Shumë njerëz mendohet se janë të bllokuar nën shtëpitë e tyre të shembura kryesisht në qytetet Suzu dhe Vajima.
