Është vizita e tij e parë jashtë shtetit për vitin 2024.
Shefi i diplomacisë britanike, David Cameron, u prit në takim nga ministrja e jashtme e Kosovës, Donika Gërvalla.
Pas takimit me dyer të mbyllura që zgjati afër një orë, Cameron dhe Gërvalla iu drejtuan medieve.
Kjo e fundit u shpreh falënderuese ndaj Britanisë që e ka përkrahur Kosovën në kohërat më të vështira.
Tutje, Gërvalla përmendi edhe sfidat me të cilat është përballur së fundmi Kosova, duke nënvizuar sulmin e 24 shtatorit në Banjskë të Zveçanit, ku mbeti i vrarë rreshteri i Policisë së Kosovës, Afrim Bunjaku.
Kurse, David Cameron, premtoi se Britania e Madhe, do të vazhdojë të ndihmojë Kosovën në sferën ndërkombëtare.
Ai gjithashtu, foli edhe për rëndësinë që të ketë siguri në rajonin e Ballkanit Perëndimor.
“Jemi përkrahës të mëdhenj të pavarësisë, sovranitetit dhe të drejtës së Kosovës për t’u njohur nga të tjerët si një vend i plotë, sovran dhe anëtar i familjes së kombeve. Ne jetojmë në një botë me pasiguri të madhe, paqëndrueshmëri të madhe, një botë me konflikte të mëdha dhe është një kohë kur vendet, si Britania, duhet t’i mbështesin miqtë tanë, të punojnë ngushtë në aleancat tona të rëndësishme dhe të investojnë në zona që kanë qenë të paqëndrueshme, por që tani po tregojnë shenja të mëdha të stabilitetit dhe progresit. Dhe, kjo është arsyeja pse ne jemi këtu dhe kjo është arsyeja pse ne duam të vazhdojmë të punojmë me ju” , tha Cameron.
Pas takimit me Gërvallen, sekretari i jashtëm britanik, zhvilloi takim edhe me presidenten e Kosovës, Vjosa Osmani.
E para e shtetit e njoftoi ministrin e jashtëm të Mbretërisë së Bashkuar, David Cameron, për përpjekjet e vazhdueshme destabilizuese të Serbisë.
“Në takim u diskutua edhe për situatën e sigurisë në rajon dhe më gjerë, me ç’rast Presidentja Osmani e informoi sekretarin Cameron për përpjekjet e vazhdueshme destabilizuese të Serbisë, përfshirë aktin e agresionit dhe aktin terrorist kundër Republikës së Kosovës më 24 shtator. Presidentja falënderoi sekretarin Cameron për shtimin e trupave britanike në kuadër të KFOR-it, duke potencuar rëndësinë e bashkëpunimit për sigurinë e kufirit me Serbinë”, thuhet nga presidenca.
Lidhur me vizitën e kryediplomatit britanik, David Cameron në Kosovë, ka lëshuar një njoftim për media edhe Ministria e Punëve të Jashtme të Mbretërisë së Bashkuar, në platformën X.
Pas takimeve me liderë shtetëror, David Cameron, vizitën e vazhdoi tek memoriali heroinat që u kushtohet grave të dhunuara gjatë luftës së fundit në Kosovë.
