Edhe kjo ndërtesë është gati të përfundojë.
E të tilla si kjo, ka shumë në kryeqytet.
Por blerja e banesave bëhet në shumicën e rasteve nga mërgimtarët.
Kështu thuhet në raportin e Bankës Qendrore të Kosovës, i cili vë në theks se blerja e patundshmërive nga diaspora përbën afër 70 përqind të investimeve nga jashtë vitin e kaluar.
Mirëpo gjatë këtij viti, Kosova ka mungesë të investimeve të huaja.
“Investimet e huaja direkte në Tre Mujorin e dytë të vitit 2023 rezultojnë të kenë shënuar rënie prej 12.5 përqind, duke arritur vlerën prej 184.4 milionë euro. Rënia IHD-ve është evidentuar kryesisht në sektorët e patundshmërisë, ndërtimtarisë dhe sektorin e xehetarisë përfshirë guroret”, është bërë e ditur nga BQK-ja.
E nga Oda Ekonomike e Kosovës thonë se në rënien e investimeve ka ndikuar pasqyrimi i Kosovës në mediat botërore.
“Kosova është shumë vend i sigurt për investime të huaja. Por fatkeqësisht incidentet por edhe fotografitë të cilat jepen në mediat botërore, jo evropiane, jo rajonale se këtu po se po, por mediat botërore na kanë dëmtu në sjelljen e investimeve të huaja sepse nëpërmjet këtyre medieve asnjëherë nuk jepet një mesazh i mirë, një produkt që po prodhohet i mirë në Kosovë. Por zakonisht fotografia e Kosovës është kur ka një incident, kur ka një mbyllje të rrugëve, kur është sulmi ndaj ushtarëve të KFOR-it dhe ti si një qytetar heziton me ardhë me investu kështu që e shtyen planifikimin qoftë për investime, qoftë për të ardhë për ta taku një mik”, ka thënë kryetari i Odës Ekonoike të Kosovës, Lulzim Rafuna.
Një tjetër faktor i rënies së investimeve sipas Aleancës Kosovare të Bizneseve është edhe vonesa e licencimit të bizneseve në vend.
“Bizneset vonohen me licenca të ndryshme të cilat investitorët ikin nga Kosova dhe shkojnë në Maqedoni apo në vende tjera qoftë edhe ndalja e investimeve kapitale të cilat kanë ndikuar drejt për së drejti në rënien e investimeve dhe në rënien e GDP-së. Për arsye se investimet kapitale janë gjenerues të zhvillimit ekonomik, po ashtu edhe të rritjes ekonomike. Kosova do të jetë një nga vendet që më së paku ka pasë investitorë të huaj”, ëhstë shprehur kryetari i Aleancës Kosovare të Bizneseve, Agim Shahini.
Se Kosova ka ngecje në tërheqjen e investimeve të huaja e thekson edhe raporti i Departamentit Amerikan të Shtetit.
“Kosova ka potencial për të tërhequr investime të huaja direkte (IHD), por ky potencial është i kufizuar nga dështimi i saj për të adresuar disa çështje serioze strukturore, duke përfshirë integrimin e kufizuar ekonomik rajonal dhe global; ndërhyrja politike në ekonomi dhe gjyqësor; furnizim jo i besueshëm me energji; një sektor i madh informal; vështirësi në vendosjen e të drejtave pronësore; korrupsioni; dhe sundimi i dobët i ligjit, duke përfshirë mungesën e zbatimit të kontratave”, ka deklaruar Departamenti Amerikan i Shtetit.
Sipas Agjencisë Evropiane të Statistikave, Eurostat, Kosova përballet me një mesatare emigrimi prej 23,933 personash në vit, apo 1.3 për qind e popullatës së përgjithshme, ndërsa kjo mërgatë, sivjet deri në tetor të 2023-tës solli në Kosovë 1, 19 miliardë euro.
