Deputetja e Lidhjes Demokratike të Kosovës, Rrezarta Krasniqi, e ka vlerësuar përpjeke për mbulim të dështimeve të Qeverisë, deklaratën e zëvendëskryeministrit Besnik Bislimi, i cila tha se masat e vendosura ndaj Kosovës kanë dëmtuar imazhin dhe zhvillimin ekonomikë të vendit.
Krasniqi në Facebook, ka shkruar se vendosja e masave ka ardhur si rezultat i injorimit të kërkesave të SHBA-së dhe BE-së për veprimet e marra nga Qeveria në veri të vendit.
“Zv/Kryeministri Besnik Bislimi, qenka përpjekur sot për t’i ikur përgjegjësisë së dështimit të kësaj qeverie, duke e akuzuar BE-në se e dëmtuan imazhin ndërkombëtar dhe zhvillimin ekonomik të vendit, me sanksionet e vendosura, të cilat kanë ardhur si përgjigje ndaj injorimit dhe mos përfilljes në veprimet e ndërmarra në pjesën veriore të vendit pa koordinim me aleatët tanë, BE dhe SHBA-në, ku për pasojë e masave të vendosura janë bllokuar projekte në vlerë prej 295 milionë eurove”, ka shkruar Krasniqi.
Ajo ka thënë se “ky pushtet është fatkeqësia e vendit”, duke listuar disa nga masat ndaj Kosovës që ende janë në fuqi.
Ndërsa, Bislimi tha se ka pasur vende që kanë qenë pro heqjes së masave ndëshkuese, por se “kompromisi u gjet përmes emëruesit më të vogël të përbashkët”.
