Gjatë adresimit të saj vjetor para deputetëve në Kuvend, presidentja Vjosa Osmani foli edhe rreth dialogut Kosovë – Serbi, me ç’rast tha se ky proces sa vjen e po bëhet më i vështirë.
Osmani theksoi se mostrajtimi i barabartë i palëve në dialog, ka bërë që të jetë “goditje për vetë kredibilitetin e procesit të dialgout”, raporton teve1.info
Ndërsa u shpreh se mosvendosja e masave ndaj Serbisë lidhur me sulmin terrorist të 24 shtatorit në Banjskë, bën që ky shtet të inkurajohet ta vazhdojë dhunën.
“Procesi i dialogut sa vjen e po bëhet më i vështirë, kjo nga jokonstruktiviteti, obstruksionet dhe përpjekjet e Serbisë që të shkaktojnë destabilitet jo vetëm në Kosovë, por edhe më gjerë. Mungesa e balancit dhe e qasjes së trajtimit të barbartë i ka bërë dëm jashtëzkoanisht të madh këtij procesi. Kosova akoma përballet me masa të padrejta e joproporcionale, të cilat prekin drejtpërdrejt interesin e qytetarëve të saj. Në anën tjetër, duke mos vendosur masa ndaj Serbisë për aktin e agresionit të 24 shtatorit dhe për sulmin ndaj ushtarëve të KFOR-it e gazetarëve gjatë majit, për fat të keq ky shtet vetëm po inkurajohet që të vazhdojë të përdorë dhunë. Një trajtim i tillë i pabarabartë i palëve do të jetë një goditje për vetë kredibilitetin e procesit të dialogut dhe pengesa kryesore për suksesin e këtij procesi”, deklaroi ajo para deputetëve.
Sa i përket draftstatutit të Asociacionit, presidentja Osmani potencoi se vlerësimin e tij e bën Gjykata Kushtetuese, teksa u bëri thirrje liderëve opozitarë që të përgatisin bashkë komentet dhe shqetësimet që kanë rreth këtij draftstatuti.
“Siç e dini të nderuar deputetë, së fundi Kosovës i është dorëzuar një propozim, draftstatut për një Asociacion të Komunave me shumicë serbe, i hartuar nga partnerët tanë. Përderisa vlerësimi i hartuesve është se një draft i tillë është në harmoni me Kushtetutën, dua të ritheksoj se institucioni që duhet ta bëjë këtë vlerëism duke udhëhequr nga parimi i pavarësisë dhe profesionalizmit është Gjykata Kushteutese. Është me rëndësi që të gjithë ne, pa dallim partiak, të ulemi dhe bashkërisht përgatisim komentet tona, bazuar në shqetësimet që mund t’i kemi dhe t’i dërgojmë ato në Gjykatën Kushtetuese, kurdo që ky draft do të dorëzohet para këtij institucioni”, shtoi e para e shtetit.
Pjesë e fjalimit vjetor të presidentes Osmani janë deputetët e LVV-së dhe LDK-së, kurse ata të PDK-së dhe AAK-së e bojkotuan atë. /Teve1.info/
