Në një konferencë për media, kryetari i PSD-së Dardan Molliqaj ka thënë se në këtë kallëzim penal kanë bashkangjitur edhe dëshmi të tjera dhe janë të bindur se kryeministri Kurti ka kryer vepër penale.
Molliqaj theksoi se do ta kishin mbështetur secilin për të pastruar listat e veteranëve, por sipas tij, qëllimi i Kurtit është që ta përbaltos veteranin e vërtetë.
“Pra, ne kemi bashkangjitur edhe dëshmi të tjera dhe bëjmë kërkesë urgjente të menjëhershme të fillimit të hetimeve sepse tanimë jemi të bindur 100% që ka edhe prova edhe bazë materiale që kryeministri i Republikës së Kosovës ka konsumuar vepër penale. Siç të gjithë e dini edhe para atij debati që u bë, kryeministri i Republikës së Kosovës tashmë është e qartë që ka një synim. Jo t’i luftoj veteranët e rrjeshëm, sepse i rrejshëm është vet. Dhe ne do ta kishim mbështetur secilin për të pastruar listat, por kryeministri i Republikës së Kosovës kishte një synim, ta përbaltos veteranin e vërtetë, ta rris presionin publik ndaj veteranëve në përgjithësi në mënyrë që ta ndërrojë një nen të ligjit për veteranët e luftës së UÇK-së”, tha Molliqaj.
Sipas Molliqajt, kryeministri nuk ka në plan t’i pastrojë listat, por “ka në plan me shkëput lidhjen ligjore që është mes pagës minimale dhe pagës ose kompenzimit për veteranët”.
Kreu i PSD-së potencoi se Prokuroria i ka të gjitha shkresat e nevojshme që të nisin hetimet menjëherë.
“Ne besojmë që Prokuroria i ka të gjitha shkresat e nevojshme që të nisin hetimet menjëherë dhe kryeministri i Republikës së Kosovës të del para drejtësisë dhe të vërtetohet ajo që tashmë është e qartë dhe e sigurt, që ai ka dhënë deklarim të rrejshëm, ka konsumuar vepër penale dhe për këtë duhet të merr vendimin e merituar. Mos harroni që Albin Kurti në këtë proces ka mashtruar Komisionin verifikues të veteranëve”, tha Molliqaj. /Teve1.info/
