Kryenegociatori i Serbisë në dialogun ndërmjet Kosovës dhe Serbisë, Petar Petkoviq, ka takuar sot në Bruksel përfaqësuesin special të Bashkimit Evropian Miroslav Lajçak.
Ai ka bërë të ditur se kanë folur me Lajçakun për marrëveshjet e arritura deri më tani dhe për formimin e Asociacionit të Komunave me Shumicë Serbe.
“Sot në Bruksel u takova me Përfaqësuesin Special të BE-së Miroslav Lajçak me të cilin kam diskutuar për të gjitha marrëveshjet e arritura deri më tani me theks të veçantë për formimin e Asociacionit, por edhe për deeskalimin e nevojshëm. Ekspertët tanë si pjesë e delegacionit nga Beogradi morën pjesë në diskutimet për formimin e Asociacionit dhe hartimin e statutit, si dhe çështjen e të zhdukurve dhe tema të tjera të rëndësishme. Si gjithmonë, erdhëm në Bruksel të përgatitur mirë”, ka shkruar ai në X.
Lajçak të dielën tha se gjatë javës së kaluar ka punuar për takime të ndara me kryenegociatorët e Kosovës dhe Serbisë.
Deri tash nuk ka ndonjë njoftim nga Qeveria e Kosovës për ndonjë udhëtim të Besnik Bislimit për ndonjë udhëtim në Brukesl.
