Kryetari i Aleancës për Ardhmërinë e Kosovës, Ramush Haradninaj, thotë Kosova është ndërtuar nën hijen e mohimit të të drejtave të njeriut.
Në 75-vjetorin e miratimit të Deklaratës Universale të të Drejtave të Njeriut, Haradinaj thotë se kjo datë për Kosovën është një kujtim i rëndësishëm, pas përjetimeve të cenimit të të drejtave nga sistemet autoritare dhe okupatore.
“Për ne si vend, kjo datë është një kujtim i rëndësishëm, pasi përjetuam cenime serioze të të drejtave tona nga sisteme autoritare dhe okupatore. Edhe sot, pas 15 vitesh nga pavarësia dhe afër 25 vjetësh prej çlirimit, jemi të përkushtuar për mbrojtjen e këtyre vlerave për të siguruar që dinjiteti i çdo qenie njerëzore është i paprekshëm”, ka shkruar ai në Facebook.
Haradinaj thotë se Kosova vazhdon rrugën drejt një të ardhme, ku drejtësia dhe respekti ndaj të drejtave të njeriut janë të garantuara.
“Kosova është ndërtuar nën hijen e mohimit të të drejtave të njeriut, dhe padyshim kujtojmë mbështetjen e miqve tanë në NATO në krye me ShBA që dënuan shkeljen e të drejtave ndaj popullit tonë. Sot, ne, si një shtet i pavarur e demokratik, vazhdojmë rrugën tonë drejt një të ardhmeje ku drejtësia dhe respekti ndaj të drejtave të njeriut janë të garantuara dhe mbrojtura si vlera themelore, duke përfshirë këtë Deklaratë në Kushtetutën tonë”, ka shkruar ai tutje./teve1.info/
