Kryetari i AKR-së, Behgjet Pacolli, ka thënë se kush është prapa vrasjes së Liridona Muselit duhet të dalë para drejtësisë.
Reagimi i tij vjen pasi sipas raportimve dyshohet se në këtë rast ka qenë i përfshirë edhe Naim Murseli, bashkëshorti i të ndjerës e që Murseli ka qenë edhe këshilltar i Pacollit kur ky mbante postin e presidentit të vendit.
Pacolli me tej, ka thënë se është i trishtuar dhe i tronditur për vrasjen e saj.
“Sot, fëmijët dhe familia kanë varrosur Liridonën, një vajzë dhe nënë të re e cila u vra mizorisht. Jam ende i tmerruar dhe i tronditur nga vrasja e Liridonës, të cilën e kam njohur personalisht. Sot dhe çdo ditë, lutjet dhe mendimet e mia janë me fëmijët dhe familjen e Liridonës.
I pergezoj policinë e Kosovës për punën e madhe dhe profesionale që po bëjnë për zbulimin e rastit. Kushdo qoftë mbrapa këtij akti të tmerrshëm dhe makabër ( akt i pa parë ne traditën tonë), duhet të dalë para drejtësisë dhe të merr dënimin maksimal për këtë. Sot, dy fëmijë janë pa nënën e tyre, të cilës jeta u mor në rininë e saj. E pabesueshme dhe e trishtueshme. Jam ende i shokuar!”, ka shkruar ai.
Ndryshe policia ka njoftuar se ka arrestuar dy persona të dyshuar në vrasjen e saj. Ndërsa në media është raportuar se njëri nga ta është bashkëshorti i saj, Naim Murseli, i cili ka qenë ish-këshilltar i Pacollit.
“Pas përfundimit të ekzaminimit të vendit të ngjarjes, janë ndërmarrë veprimeve intensive hetimore të cilat kanë rezultuar në arrestimin e dy personave të dyshuar lidhur me rastin e sipër shënuar”, ka thënë zëdhënësja e policisë, Flora Ahmeti.
Ajo ka bërë të ditur se njësiti i hetimeve të përgjithshme të Prishtinës në koordinim me Prokurorinë është duke e vazhduar operacionin e bastisjes në dy lokacione në Gjakovë.
Me 29.11.2023 rreth orës 20:20, Policia kishte marrë informata për të shtëna me armë në rrugën “Dalip Alshiqi” në Prishtinë.
Në këtë rast të cilin Policia e kishte cilësuar si “grabitje me armë zjarri- vrasje”, një grua kishte mbetur e vrarë, pasi disa persona të armatosur kishin kryer grabitje ku edhe dyshohet se ka shtënë me armë ndaj gruas.