KEDS ka bërë të ditur se ekipa e tyre kanë kapur duke vjedhur energjinë elektrike një hotel në Pejë.
Në njoftim thuhet se ky hotel tashmë është i detyruar t’ia paguajë KEDS-it 37 mijë e 398.54 euro si rikthim i humbjes që ia ka shkaktuar kompanisë.
Tutje, thuhet se pronarët pritet të dënohen edhe nga gjykata, sipas ligjit.
“Kjo ndodhi pas kontrollit që i bënë ekipet tona në tre njehsorët që i kishte në objekt, prej nga rezultoi që po e keqpërdorte energjinë elektrike në secilin prej tyre. Sipas ligjit, rikthimi i humbjeve duhet të bëhet me faturën e barasvlershme për një vit, pasi po flasim për konsumator komercial. Por, kjo nuk është e tëra, pasi ai pritet të dënohet edhe nga gjykata kompetente.
Prandaj, në secilën rrethanë përdorimi i ligjshëm i energjisë elektrike është më i favorshmi. Rryma t’kushton ma lirë!”, thuhet në njoftimin e tyre.