Pas diskutimeve të shumta, Kuvendi i Kosovës më 16 nëntor miratoi në shqyrtim të parë Projektligjin mbi ndarjet buxhetore për vitin 2024.
Shuma e paraparë buxhetore kap vlerën e mbi 3.3 miliardë eurove.
Sipas Qeverisë, buxheti do të rritet në disa sektorë vitin e ardhshëm, përfshirë sigurinë, shëndetësinë, ekonominë dhe arsimin.
Mirëpo lidhur më këtë nga opozita shprehën kritika.
Ferat Shala, kryetar i Komisionit për Ekonomi njëherësh edhe deputet i PDK-së konsideron se ky buxhet nuk do të jetë zhvillimor.
“E kemi një buxhet fatkeqësisht jo zhvillimor, social një buxhet i cili nuk na jep prespektivë për zhvillimin e kapaciteteve investuese kapitale nuk na jep prespektivë në hapjen e vendeve të reja të punës, nuk na jep prespektivë për zhvillimin dhe ristrukturimin e ndërmarrjeve publike që janë premtim i kësaj qeverie, nuk kemi planifikim për thithjen e investitorëve të jashtëm”, thotë Shala.
Tutje, deputeti opozitar thotë se ky buxhet është diskriminues derisa rendit dhe disa arsye.
“Shqetësuese është fakti që pjesa dërrmuese e buxhetit shkon në kategoritë e linjës buxhetore subvencione që është mbi 1.1 miliardë euro, ndërsa kemi shumë më pak diku rreth 800 milionë euro investime kspitale. Pastaj buxheti ka një mangësi tepër është jashtëzakonisht diskriminues mbi bazën e regjioneve dhe menaxhimit politik të pushteteve lokale, pra kemi një dispropocion edhe logjik edhe lokal sa i përket komunave ku nuk menaxhohet nga LVV”, ka thënë ai.
Megjithatë njohësi i ekonomisë Jakup Bellaqa mendon të kundërtën.
Bellaqa thotë se këtë buxhet e sheh më shumë zhvillimor se social.
“E shoh më shumë buxhet zhvillimor se social sepse ka rritje diku 102 milionë euro krahasuar me vitin e kaluar, kuptohet që kërkesat dhe nevojat e qytetarëve janë më të mëdhaja mirëpo ka progress dhe rritje dhe sidomos ka rritje në sektor strategjik”, vlerëson ai.
Pesë institucionet me buxhetin më të madh në vitin 2024 pritet të jenë: Ministria e Financave, Ministria e Mjedisit, Ministria e Punëve të Brendshme, Ministria e Mbrojtjes si dhe Shërbimi Spitalor dhe Klinik Universitar i Kosovës.
