Në 16 ditët e Aktivizmit, presidentja e vendit, Vjosa Osmani ka bërë thirrje për mobilizim dhe bashkim kundër dhunës mbi baza gjinore.
“Le ta thyejmë heshtjen njëherë e përgjithmonë, duke qëndruar së bashku jo vetëm gjatë #16ditëve, por gjatë tërë vitit. Ta fuqizojmë njëra-tjetrën për një botë ku të gjithë mund të jetojnë pa frikë dhe pa diskriminim. Bashkë kundër heshtjes për t’i sfiduar stereotipet dhe për një mjedis ku gratë e vajzat nuk ndihen të kërcënuara e as të rrezikuara. Së bashku, kundër dhunës për një shoqëri të rrënjosur në barazi”, është shprehur Osmani.
Në kuadër të aktiviteteve të 16 Ditëve të Aktivizmit, ndërtesa e Presidencës është ndriçuar me ngjyrë portokalli.
Fushata globale “16 Ditët e Aktivizmit Kundër Dhunës me Bazë Gjinore” ka për qëllim eliminimin e dhunës ndaj grave, duke siguruar qasje në drejtësi dhe mbrojtje institucionale.
