Ashtu siç ishte pritur, Aleksandër Vuçiq, fitoi edhe një mandat si president i Serbisë në zgjedhjet e 3 prillit.
Pas triumfit në zgjedhje, ai me krenari tha se është udhëheqësi që ka qëndruar më së gjati në pushtet që nga koha e Nikola Pashiq.
Fitoren në këto zgjedhje, ai e quajti të pastër dhe të bukur.
Por kështu nuk mendon profesori nga “Johns Hopkins” University, Daniel Serwer, i cili thotë se Presidenti serb, Aleksandër Vuçiq ka abuzuar me pushtetin për zgjedhjet presidenciale.
“Unë e përgëzoj presidentin Vuçiq, por zgjedhjet që ai fitoi ishin në një fushë loje të pabarabartë sipas fjalëve të OSBE-së. Zgjedhjet nuk mund të them se ishin krejtësisht të lira për shkak të abuzimit me pushtetin nga qeveria në detyrë”, tha Serwer.
Sipas Daniel Serwer në Serbi ka elemente të autoritarizmit dhe se Vuçiq nuk ka bërë asgjë për ta përmirësuar situatën.
“Serbia nuk ka as një gjyqësor të pavarur dhe as një shtyp të lirë. Ndonëse mendoj se ka pak dyshime se shumica e mbështet presidentin Vuçiq, ai nuk ka bërë asgjë për të përmirësuar situatën as për gjyqësorin dhe as për median. Këto janë me siguri elemente të autoritarizmit”, shtoi ai.
Lideri i partisë progresiste serbe, Aleksandër Vuçiq, që në raundin e parë siguroi mbi 60% të votave.
Si befasi në këto zgjedhje u vlerësua pjesëmarrja e lartë e qytetarëve serb të cilët më shumë anuan nga partitë e djathta me bindje konservatore e nacionaliste.
Raporti i gazetarit Shpat Blakçori.
