Deputetja e Partisë Demokratike të Kosovës, Ganimete Musliu, deklaroi që Kuvendi i Kosovës do të duhej të reagonte me çdo kusht në shkeljen e të drejtave themelore të njeriut, e me ç’rast përmendi ish-krerët e UÇK-së që po gjykohen në Hagë.
Gjatë seancës plenare në Kuvend, Musliu vlerësoi që Kosova tanimë “s’duhet t’i pranojë padrejtësitë e Gjykatës Speciale”.
“Ky Kuvend e ka votuar këtë gjykatë dhe ky Kuvend do të duhej të ishte i pari të reagojë kur shkelen të drejtat themelore të njeriut. Prandaj, është koha e fundit të mendojmë nëse dëshirojmë të heshtim, të nënshtrohemi e turpërohemi, apo të tregojmë se kemi krenari shtetërore dhe kombëtare, kemi ligje e Kushtetutë, e t’i themi stop padrejtësive në emër të shtetit, e në emër të popullit të Kosovës. Kjo gjykatë çdo ditë po e shfaq dështimin dhe jo profesionalizimin e saj. Andaj, këto dukuri e zhvillime janë të papranueshme”, deklaroi Musliu para deputetëve.
Kujtojmë se ish-krerët akuzohen për krime të luftës: arrestim dhe ndalim i paligjshëm, trajtim mizor, torturë dhe vrasje e paligjshme. Ndërkaq, krimet kundër njerëzimit që ata akuzohen se kanë kryer janë: përndjekje, burgosje, akte të tjera çnjerëzore, torturë, vrasje e paligjshme dhe zhdukje me forcë e personave.
Krimet dyshohet se janë kryer nga marsi i vitit 1998 deri në shtator 1999, në disa lokacione të Kosovës, por edhe në Kukës dhe Cahan të Shqipërisë.
