Është miratuar në mbledhjen e Qeverisë, shqyrtimi i projektligjit për gjendjen civile.
Ministri i punëve të Brendshme, Xhelal Sveçla tha se përmes këtij ligji synohet avancimi i kornizës ligjore të gjendjes civile në përgjithësi, avancimi i sigurisë së të dhënave dhe forcimi i mekanizmave për parandalimin dhe luftimin e rasteve të personave të paregjistruar.
“Ky projektligj ka për qëllim rregullimin e sistemit për regjistrimin dhe evidentimin e akteve dhe përbërësve të gjendjes civile, mundëson regjistrimin e të gjitha fakteve të ndodhura në territorin e Republikës së Kosovës, rregullon obligimin e institucioneve për raportim zyrtare të fakteve natyrore, bën rregullimin e përdorimit dhe ruajtjes së të dhënave si dhe përcakton organet relevante në fushën e gjendjes civile”, ka deklaruar ai në mbledhjen e Qeverisë.
Po, ashtu gjatë kësaj mbledhje është miratuar edhe shqyrtimi i projektligji për letërnjoftim.
Me këtë projektligj iu mundësohet të gjithë qytetarëve që nga lindja që të pajisen me letërnjoftim.
“Ky projektligj përcakton kushtet, procedurat, organin kompetent për lëshimin, kushtet për përdorimin e letërnjoftimit si dhe detyrimet e shtetasit të Republikës së Kosovës në raport me përdorimin e tij. Si risi e këtij projektligji është krijimi i mundësisë që shtetasi i Kosovës që nga lindja deri në moshën 16 vjeçare të mund të pajisët me letërnjoftim, por pa qenë i detyruar. Kjo do të iu mundësojë qytetarëve të kësaj moshë të lëvizin jashtë Republikës së Kosovës vetëm me letërnjoftim në ato vende në të cilat ka marrëveshje Kosova. Projektligji po ashtu rregullon shfrytëzimin e të dhënave elektronike nga letërnjoftimi, formën dhe përmbajtjen e letërnjoftimit, afatin e vlefshmërisë së tij si dhe rregullat në rast të dëmtimit, humbjen apo vjedhjes së tij”, ka deklaruar Sveçla.
