Kryeministri i vendit, Albin Kurti bën të ditur se gjatë takimit që pati dje me përfaqësues e pjesëtarë të Njësisë Speciale dhe Intervenuese të Policisë së Kosovës (NJSI), i ka njoftuar se vlerat e shtesave për rrezikshmëri janë bërë me kujdes të veçantë.
Gjatë mbledhjes së Qeverisë, kreu i Ekzekutivit potencoi se do vazhdojnë përkushtimin për përmirësimin e kushteve të PK-së, përcjell teve1.info
“I njoftuam dhe siguruam ata se kategorizimi dhe vlerave e shtesave është bërë me kujdes të veçantë të shtuar duke marrë në konsideratë të gjithë faktorët rreth punës dhe përgjegjësive të tyre, por në të njëjtën kohë duke pasë parasysh edhe kufizimet të cilat ekzistojnë. Jemi dhe do të vazhdojmë të mbetemi të përkushtuar për përmirësimin e kushteve dhe pajisjeve të punës për Policinë e Kosovës, në mënyrë që krahas lehtësimit në punë të ndikojmë drejtpërdrejt edhe në uljen e rrezikut gjatë kryerjes së detyrave dhe përgjegjësive”, deklaroi ai.
Tutje, Kurti njoftoi se shtesat për muajt e deritanishëm do të ndahen në mënyrë retroaktive, me ç’rast pritet të përfitojnë afër 8 mijë zyrtarë.
“Shtesa për rrezikshmëri do të fillojë së aplikuari nga paga e muajit nëntor, kurse për muajt e deritanishëm, nga hyrja në fuqi e ligjit të ri për paga, ajo do të ndahet në mënyrë retroaktive. Me aprovimin e këtij vendimi, pritet të përfitojnë afër 8 mijë zyrtarë policorë, apo saktësisht 7 mijë e 991”, shtoi kryeministri Kurti.
Ndërkaq, Ministri i Financave, Hekuran Murati potencoi se Komisioni për kushte specifike të punës ka dorëzuar listat përfundimtare.
“Me ligjin për paga të sektorit publik ekzistojnë edhe kufizime sa i përket shtesave. Shtesat e miratuara janë në lartësi 7.6 milionë euro. Konsiderojmë që është bërë një punë e jashtëzakonshme në mënyrë që të sigurohemi që ka shpërndarje të drejtë”, ka thënë ai. /Teve1.info/
