Drafti evropian për asociacionin ka nxitur debate të mëdha në vend. Një nga shqetësimet kryesore është përmendur edhe elementi i arbitrazhit që parashihet në këtë draft. Por njohësit e çështjeve politike thonë se ndërkombëtarët duhet ta mbikëqyrin asociacionin deri sa Kosova të anëtarësohet në NATO.
Kryetemë e diskutimeve aktuale në kuadër të dialogut për Kosovën është drafti i Asociacionit, të cilin e kanë sjellë emisarët euro-amerikanë.
Për këtë dokument, kryeministri i Kosovës Albin Kurti, ka deklaruar, që nuk është siç ai do të dëshironte, por është më i mirë se ai i vitit 2013 dhe 2015.
Por, Ehat Miftaraj nga Instituti i Kosovës për Drejtësi, thotë se bazuar në draftin e publikuar, elementi i arbitrazhit nuk duhet të ketë vend në draftin e asociacionit.
“Ndër pikat që besoj që do të duhej të mos pranoheshin nga Kosova është pjesa e arbitrazhit e cila në një farë mënyre, jep të drejtë që një mekanizëm i huaj të vlerësoi çështje të cilat në një farë mënyre mund të jenë kontestuese mes autoriteteve të Kosovës dhe në këtë rast komunave me shumicë serbe në Kosovë … Ministria e Pushtetit Lokal do të duhej të ishte mekanizmi i cili në një farë mënyre do të vlerësonte ligjshmërinë e vendimeve, rregulloreve që miraton ku Asociacion, por në të njëjtën kohë njëfarë mënyre do të duhej të shërbente si mekanizëm i cili sigurohet që asociacioni të mos dal jashtë kompetencave të saj”, tha Ehat Miftaraj nga Instituti i Kosovës për Drejtësi.
Për mos ndryshimin e kompetencave të asociacionit, njohësi i çështjeve politike Melazim Koci, thotë se duhet mbikëqyrja evropiane e këtij rregullimi, deri në anëtarësimin e Kosovës në NATO.
“Unë mendoj se ekziston një siguresë e cila mund ta përjashtoi rrezikun, pjesën më të madhe të rrezikut. Në dokument parashihet mbikëqyrje e Bashkimit Evropian, e punës së Asociacionit për 2 deri në 5 vite, unë mendoj që Kosova duhet të dal me një kërkesë të prerë, që ajo mbikëqyrje të vazhdoi deri në çastin e inkuadrimit të Kosovës në NATO. Kjo do të ishte siguresë për Kosovën që ajo pjesë të mos shkëputet”, tha njohësi i çështjeve politike, Melazim Koci.
Të enjten kryenegociatorët do të kenë një takim në Bruksel në kuadër të dialogut, ku pritet të diskutojnë edhe për draft-statutin e asociacionit.
