Profesori nga Johns Hopkins University, Daniel Serwer ka bërë të ditur vlerësimin e tij rreth përmbajtjes së draft-statutit të Asociacionit të Komunave me Shumicë Serbe, i cili ka qarkulluar ditët e fundit në media.
Profesori amerikan thotë se ana pozitive është fakti se ky mekanizëm për serbët e Kosovës do të shqyrtohet nga Gjykata Kushtetuese e Kosovës, duke përfshirë çdo ndryshim të statutit.
Gjithashtu sipas tij, një tjetër aspekt pozitiv i dokumentit është edhe referenca “Republika e Kosovës” dhe roli i theksuar i Ministrisë së Administrimit të Pushtetit Lokal (MAPL) të Qeverisë së Kosovës në themelimin e tij.
“Anëtarësimi në Asociacionin e Komunave me Shumicë Serbe është vullnetar për komunat me shumicë serbe. Komunitetet joserbe duhet të përfaqësohen edhe pse në një mënyrë të papërcaktuar. BE-ja do të sigurojë mbikëqyrje për 5 vjet e rinovueshme edhe për 5 të tjera”, ka shtuar profesori amerikan për të përmbyllur pesë “të mirat” që burojnë nga draft-statuti.
Teksa ka komentuar “të këqijat” e draft-statutit të Asociacionit, Serwer është shprehur se një pjesë e draft-statutit ku flitet për qëllimin e këtij mekanizmi, ekziston mundësia e pranimit të kompetencave ekzekutive në fushat e përgjegjësisë komunale tashmë ekzistuese për serbët e Kosovës.
Sipas tij, një dispozitë parasheh “kompetenca ekzekutive” për këtë mekanizëm.
“Asociacioni i Komunave me Shumicë Serbe mund të miratojë rregullore, vendime, deklarata, rregullore dhe udhëzime. Kjo dispozitë parashikon qartë kompetenca ekzekutive. Qeveria e Serbisë përmes Asociacionit të Komunave me Shumicë Serbe mund të ofrojë shërbime shëndetësore dhe arsimore. Kjo e cenon sovranitetin e Kosovës”, ka theksuar ai.
Ditëve të fundit, janë publikuar fragmente të cilat pretendohet se janë pjesë nga draft-statuti i Asociacionit të Komunave me Shumicë Serbe, por zëdhënësi i BE-së, Peter Stano nuk i ka komentuar këto dokumente, teksa ka thënë se propozimi nuk është bërë publik ngase përpjekjet diplomatike janë në vazhdim.
