Presidenti francez Emmanuel Macron bëri thirrje të enjten për një armëpushim në Gaza kur hapi një konferencë për ndihmën në territorin palestinez, nën bombardimet e Izraelit që nga sulmi i 7 tetorit nga Hamasi.
“Në afat të menjëhershëm, ne duhet të punojmë për mbrojtjen e civilëve. Për ta bërë këtë, ne kemi nevojë për një pauzë humanitare shumë shpejt dhe ne duhet të punojmë drejt një armëpushimi,” u tha Macron delegatëve në Paris.
Izraeli ka qëndruar larg bisedimeve rreth ndihmës për civilët në enklavën prej 2.4 milionë banorësh, ku ministria e shëndetësisë e drejtuar nga Hamasi thotë se fushata ushtarake e Izraelit ka vrarë më shumë se 10,500 njerëz, shumë prej të cilëve fëmijë, raporton AFP.
Militantët e Hamasit sulmuan përtej kufirit nga Gaza në Izrael më 7 tetor, duke vrarë më shumë se 1,400 njerëz, kryesisht civilë, dhe duke marrë më shumë se 240 pengje, thonë zyrtarët izraelitë.
Kryeministri izraelit Benjamin Netanyahu ka thënë se nuk do të ketë karburant në Gaza dhe nuk do të ketë armëpushim me Hamasin, nëse pengjet nuk lirohen.
Macron foli me Netanyahun të martën dhe dyshja do të bisedojnë përsëri pasi të përfundojë konferenca e ndihmës e së enjtes, tha Pallati Elysee.
