Zëdhënësi i Partisë Demokratike të Kosovës, Faton Abdullahu, vlerësoi që Qeveria Kurti, qëllimisht po komplikon draft-statutin për themelimin e Asociacionit të komunave me shumicë serbe.
Përmes një postimi në Facebook, Abdullahu ka shkruar se në këtë mënyrë, kundërshtimi i Asociacionit do të jetë më i paktë, njëherit qytetarët do ta pranojnë më lehtë.
“Asociacioni sa mi i komplikuar aq më mirë për Qeverinë – prandaj ‘Zot bone llugë’ të mos i bjen në fije hiç askush, asnjëherë. Sa më i paqartë Asociacioni aq më lehtë e bën Qeveria të pranueshëm për qytetarët. Sa më i paqartë Asociacioni aq më pak kuptohet drejtë dhe mirë. Sa më i paqartë Asociacioni aq më pak do ta kundërshtojnë. Aq më pak do të kuptohen mirë dhe drejtë kundërshtimet që i bëjnë opozita dhe gjithë të tjerët. Aq më pak do të dëmtohet Qeveria Kurti dhe VV-ja. mAq më larg zemrës. Aq më shpejt harrohet. Aq më keq do të bëhet”, thuhet në postimin e Abdullahut.
Më tej, zëdhënësi i PDK-së, ka përmendur disa pretekste, që sipas tij, Qeveria po i përdor për komplikimin e këtij drafti.
“Qëllimisht komplikimi vazhdon, prandaj nuk i dihet – me nënshkrim apo pa nënshkrim, u pranua nuk u pranua, autonomi jo nuk është autonomi, menaxhim apo jo, Vuçiqi e pranoj jo e refuzoj, Amerikanët e përkrahin shumë jo kanë rezerva pak, Lajqaku i mirë apo vazhdon të jetë i njëjti, transparencë apo nuk ka transparencë, Gjermanët me ne apo veç me Kurtin, Franca kundër apo jo, Statuti, Drafti, finalja jo nuk është finalja, Rama, Rusia, Ukraina”, thuhet tutje.
“Vazhdojeni ju miq listën edhe pse zor me qenë më kreativ se Qeveria në komplikime e paqartësi”, ka përfunduar Abdullahu./teve1.info/.