Pjesëtarët e Forcës së Sigurisë së Kosovës, kanë përfunduar trajnimin në xhudo, në kuadër të marrëveshjes së Ministrisë së Mbrojtjes me Federatën e Xhudos, në kuadër të programit “Kosova, shtet i xhudos”.
Ministri i Mbrojtjes, Ejup Maqedonci tha se certifikimi i grupit të parë është moment historik.
“Pjesëtarët e Forcës së Sigurisë së Kosovës përfunduan me sukses trajnimin në këtë sport me udhëheqjen e kryetrajnerit Driton Kuka dhe xhudistëve elitarë të Kosovës. Ishte vërtetë kënaqësi që sot së bashku me kryeministrin Kurti dhe ministrin Çeku të merrnim pjesë në ceremoninë e certifikimit të tyre, që shënon përvetësimin e suksesshëm të aftësive të vetëmbrojtjes, teknikave të xhudos dhe luftës së afërt. Certifikimi i grupit të parë është moment historik i jashtëzakonshëm që mishëron frymën e unitetit, përkushtimit dhe vizionit të përbashkët për rritjen e shtetit tonë”, ka shkruar ai.
