256 automjete kanë kaluar targat ilegale në targa RKS, që nga dita e djeshme, pas vendimit të Qeverisë për zgjatjen e afatit deri më 1 dhjetor.
Kështu bëri të ditur ministri i Brendshëm, Xhelal Sveçla i cili theksoi se ky proces po vazhdon suksesshëm, përcjell teve1.info
“Me vendim të Qeverisë, nga dje është hapur afati 30 ditorë për regjistrimin e veturave me targa ilegale të Serbisë në targa të Republikës së Kosovës, RKS. Që nga dje ka pasur interesim të madh të regjistrimit të veturave me ç’rast 256 automjete kanë kaluar nga targat ilegale në targa RKS dje dhe sot. Përveç që do të ngrisim kapacitetet në Komunën e Leposaviqit, për të parë nevojat e Qendrave të Regjistrimit vizituam stafin në edhe në Zveçan dhe në Mitrovicë të Veriut. Procesi i regjistrimit të veturave në RKS po vijon suksesshëm andaj shfrytëzoj rastin të ftoj të gjithë qytetarët tanë të komunitetit serb të regjistrojnë veturat në RKS në ditët në vijim deri me 1 dhjetor”, ka shkruar ai në Facebook.
Ministri Sveçla së bashku me ministrin e Ministrisë për Administrimin e Pushtetit Lokal, Elbert Krasniqi janë takuar sot me kryetarin e Leposaviqit, Lulzim Hetemi dhe drejtorin e Agjencionit të Regjistrimit Civil, Blerim Camaj.
Sot është nënshkruar memorandum mes Agjencionit të Regjistrimit Civil dhe Komunës së Leposaviqit, me ç’rast do të jepet në shfrytëzim një hapësirë e Komunës për sportele të zyrtarëve të ARC-së “për të ju përgjigjur me efikasitet kërkesave të qytetarëve për regjistrimin e automjeteve dhe pajisjes me dokument”. /Teve1.info/
