Ka filluar takimi mes anëtarëve të Komisionit për Ekonomi dhe sindikalistëve të Trepçës, i thirrur nga Lëvizja Vetëvendosje.
Me këtë rast, kryetari i Sindikatës së punëtorëve të Trepçës, Ibrahim Jonuzi bëri thirrje që grevës së minatorëve të mos i jipet konatacion politik, përcjell teve1.info
Siç bën të ditur ai, jeta e minatorëve është në rrezik dhe shumë prej tyre janë në gjendje të rëndë shëndetësore.
Ai shtoi se kjo çështje duhet të shkojë jashtë politikës, dhe humanizimi të vendoset në rend të parë.
“Ne tani kemi hyrë në ditën e tetë të grevës së minatorëve. Për ne janë tri kërkesa, që janë kërkesa sociale…andaj me fillim bëj thirrje që mos t’i jepim konatacion politik, vazhdojmë të gjejmë rrugëzgjidhje për një epilog përfundimtar, sepse jeta e minatorëve, shëndeti i tyre është duke u rrezikuar…atje situata është e rëndë, veçse kemi hyrë në ditën e tetë të grevës, kemi shumë persona që kanë kërkuar ndihmë dhe janë në gjendje të rëndë shëndetësore. Kjo duhet të shkojë përtej politikës, duhet të vendoset humanizimi në rend të parë, që ta gjejmë një zgjidhje, sepse është obligim i yni dhe i juaji”, deklaroi Jonuzi.
Jonuzi shtoi se minatorët janë të palëkundur në kërkesat e tyre.
Në mbledhjen e sotme të Komisionit për Ekonomi, ishte paraparë të raportonte ministrja Artane Rizvanolli, por e njëjta kishte njoftuar se është në udhëtim jashtë vendit.
Sot shënon dita e tetë prej kur minatorët e minierës me flotacion kanë hyrë në grevë urie.
Kërkesat e tyre janë realizimi i pagës nga data 6 deri me datën 10 të çdo muaji, dorëheqja apo shkarkimi i u.d i kryeshefit, Enis Abdurrahmani dhe kërkesa për sigurim shëndetësor dhe përmirësimin e kushteve.
Teksa një numër i madh i minatorëve kanë kërkuar ndihmë mjekësore. /Teve1.info/
