Ministria e Administrimit të Pushtetit Lokal (MAPL) i ka quajtur të pavërteta deklarimet e Listës Serbe që tha se Qeveria ka dhënë urdhër për gërmim të varrezave ortodokse serbe në veri të Mitrovicës.
MAPL-ja përmes një reagimi të mërkurën tha se s’ka asnjë vendim nga Qeveria apo komuna për punime të tilla, duke thënë se në kuadër të skemës për ndërtimin dhe renovimin e shtëpive për komunitete joshumicë, është përzgjedhur financimi për ndërtimin e shtëpisë së një banori.
“Në anën tjetër, Ministria e Administrimit të Pushtetit Lokal, sqaron se në kuadër të skemës për ndërtimin dhe renovimin e shtëpive për komunitetet jo shumicë në Komuna, pas vlerësimit nga komisioni profesional ka përzgjedhur të financoj ndërtimin e shtëpisë për pronarin R.C. MAPL, subvencionon vetëm ndërtimin e shtëpisë në sipërfaqe prej 62m2. Përfituesi është i obliguar që të kontraktoj operatorin ekonomik për ndërtimin e shtëpisë dhe përmes subvencionit e kryen pagesën në mënyrë direkte. Në lidhje me hapjen e rrugës dhe dëmtimin e varrezave ortodokse nuk mban asnjë përgjegjësi pasi që ky program financon vetëm ndërtimin e shtëpisë dhe jo infrastrukturën rrugore”, thuhet në njoftimin e ministrisë.
Ministria e Administrimit të Pushtetit Lokal ka shtuar se investimet e Qeverisë do të jenë në shërbim të qytetarëve, pa cenuar asnjë të drejtë të ndonjë komuniteti apo individi.
Lista Serbe ka pretenduar të martën se Qeveria Kurti ka urdhëruar gërmimin e varrezave serbe nga kompani shqiptare.
“Pasi regjimi i Albin Kurtit nisi procesin e marrjes së tokës serbe nga nikoqirët tanë punëtorë dhe shtrimin e rrugëve ndërmjet fshatrave serbe, tani ata kanë guxuar të shtrojnë varrezat tona, t’i përdhosin dhe të shpërndajnë eshtrat e të parëve tanë”, thuhet në reagim.
Ndërsa, zëvendësdrejtori i Policisë së Kosovës për rajonin e veriut, Veton Elshani, tha të mërkurën për Radion Evropa e Lirë (REL) se rasti është duke u hetuar.
Policia e rrethoi zonën me shirit bardhekuq, që do të thotë se punimet e mëtejshme janë ndaluar.
Kryetari i Komunës së Mitrovicës së Veriut, Erden Atiq, tha për REL-in se ka qenë “gabim teknik i kompanisë që ka fituar tenderin nga Ministria e Infrastrukturës” dhe se ende nuk ka informacione të hollësishme.