Marrëveshja e Stabilizim Asocimit e nënshkruar mes Kosovës dhe BE-së, sot shënon 6 vjetorin e hyrjes në fuqi.
Opinionisti Taulant Kryeziu, këtë marrëveshje e cilëson si një traktat që parasheh të gjitha reformat deri në anëtarësimin e Kosovës në BE.
“Ky është një traktat ndërkombëtar i cili e njeh Kosovën si entitet edhe ligjor edhe politik, pra i cili përcakton rrugëtimin tonë drejtë Bashkimit Evropian dhe bazohet në katër shtyllat kryesore. Çështja e parë ka të bëjë me dialogun politik, harmonizimin e legjislacionit, çështjet tregtare dhe raporti ose bashkëpunimi rajonal që është element shumë i rëndësishëm. Pra, aty ngërthehen të gjitha reformat që duhet të ndërmerr Kosova, deri në atë që quhet traktati i anëtarësimit, pra dokumenti i ardhshëm i cili nënshkruhet kur Kosova të jetë vend anëtar i Bashkimit Evropian”, tha Kryeziu.
E Qemajl Marmullakaj nga instituti i Kosovës për Drejtësi thotë se vitin e kaluar qeveria ka pasur një zbatim të ulët të kësaj marrëveshje në sektorin e sundimit të ligjit.
“Gjatë vitit të kaluar në fushën e sundimit të rendit dhe ligjit nga 23 aktivitete që kanë qenë të ndërlidhura me agjendën evropiane Qeveria e Kosovës, apo Ministria e Drejtësisë në këtë rast ka arritur t’i zbatoj 17 prej tyre. Nëpërmjet këtyre shifrave mund të vlerësohet që ekziston një zbatim shumë i ulët i MSA-së”, tha Marmullakaj.
Përmbushja e zotimeve që dalin nga MSA është edhe një parakusht për Kosovën në të përgatitet për rrugëtimin e saj drejt anëtarësimit në BE në të ardhmen. Kjo marrëveshje ishte nënshkruar më 27 tetor të 2015-ës, mes ish-kryeministri Isa Mustafa, dhe ish- krye diplomatja evropiane, Frederica Mogherini.
Raporti i gazetarit Valmir Gallopenin.
