Njohësi i rrethanave në Lindjen e Mesme, Muhamed Kajolli thotë se bombardimi në një spital në Gaza, ku mbetën të vdekur shumë persona, ishte goditje shumë qyqare.
Sipas tij, nëse grupi i armatosur palestinez, Xhihadi Islamik është përgjegjës për këtë sulm, ashtu siç e akuzon Izraeli, atëherë këta të fundit, përmes teknologjisë do të shfaqnin video prej nga ka ardhur raketa dhe ku është hedhur.
“Normalisht ishte një goditje shumë qyqare, shumë jo ç’njerëzore të goditet spitali…tash ata u shprehën se ne nuk e kemi bërë një gjë të tillë, do të thotë Izraeli. Por sikur ta kishin bërë përshembull Xhihadi Islamik, se ata e akuzojnë Xhihadin Islamik se ata kanë goditur, unë jam i bindur se sot me teknologjinë që e ka bota, e sidomos Izraeli, do ta nxirrte nga ku u hedh ajo raketë, prej Xhihadit Islamik, se sot ke kamera në çdo cep, plus janë kamerat mbi qiell që e vëzhgojnë luftën. Çdo detaj të luftës. Por nuk nxori Izraeli një video prej ku erdhi raketa dhe ku u hodh raketa. Sikur ta nxirrte një video të tillë, atëherë do ta besoja unë”, deklaroi ai në “Info Nata” në Tëvë 1.
Një sulm vdekjeprurës ajror ka ndodhur më 17 tetor ndaj një spitali në Rripin e Gazës, teksa zyrtarët izraelitë dhe palestinezë akuzojnë njëri-tjetrin se kush ishte fajtori.
Që nga sulmet e grupit militant palestinez, Hamas, ndaj Izraelit më 7 tetor, Izraeli ka kryer sulme të vazhdueshme në Rripin e Gazës. Që nga shpërthimi i dhunës, mijëra persona janë vrarë në të dyja anët e konfliktit. /Teve1.info/