Kryeministri i Kosovës, Albin Kurti, ka pritur në takim ambasadorin e parë rezident të Belgjikës.
Kurti tha se vendimi i Belgjikës për të ngritur përfaqësimin diplomatik në Kosovë në nivel ambasade, shënon ngritje pozitive të raporteve më Belgjikën.
Sipas komunikatës Kurti ka falënderuar Belgjikën për ndihmën e dhënë dhe ka shpresuar në vazhdim të mbështetjes në rrugën euro-atlantike të Kosovë.
“Kryeministri falënderoi Ambasadorin Culivier për mbështetjen e Mbretërisë së Belgjikës në rrugën euro-atlantike të Republikës së Kosovës dhe përkrahjen për anëtarësimin në organizata ndërkombëtare. Ai tha se Republika e Kosovës shpreson në mbështetjen e Belgjikës edhe tutje, në proceset integruese euro-atlantike, përmbylljen e anëtarësimit në Këshillin e Evropës, kandidaturën për anëtarësim në BE, përfshirjen e Republikës së Kosovës në programin Partneritet për Paqe të NATO-s si dhe anëtarësimin në NATO”, ka thënë Kurti, thuhet në komunikatë.
Në takim u bisedua lidhur me situatën aktuale dhe sulmin terrorist nga ana e Serbisë më datën 24 shtator në Banjskë.
“Ambasadori shprehu ngushëllime për policin e rënë në detyrë, Afrim Bunjaku, si dhe uroi shërim të shpejtë policëve të lënduar. Kryeministri gjithashtu shprehu ngushëllime për jetët e humbura nga sulmi në Bruksel”, thuhet në komunikatë.
Nga 1 janari deri më 30 qershor 2024, Belgjika do të ketë presidencën e Këshillit të Bashkimit Evropian. Kryeministri veçoi këtë si mundësi për thellimin e bashkëpunimit mes dy vendeve në lidhje me integrimin evropian të Kosovës./teve1.info/