Prokuroria Themelore në Gjakovë bën të ditur se ka kërkuar caktimin e masës së paraburgimit për të dyshuarin K.SH.. pronari i një lokali ushqimor në Malishevë në të cilin mbetën të helmuar 145 persona.
Sipas Prokurorisë, i dyshuari ka kryer veprën penale “Prodhimi dhe vënia në qarkullim e artikujve të dëmshëm ushqimorë”, përcjell teve1.info
“Prokuroria Themelore në Gjakovë, Departamenti i Përgjithshëm, njofton opinionin publik se ndaj të pandehurit me inicialet K.SH ka marrë Aktvendim për fillimin e hetimeve si dhe ka paraqitur, kërkesë në Gjykatën Themelore në Gjakovë – Dega Malishevë, për caktimin e masës së paraburgimit në kohëzgjatje prej 30 ditësh, i pandehuri me vendim të Prokurorit të Shtetit gjendet nën masën e ndalimit 48 orësh. Sipas kërkesës së Prokurorisë, ekziston dyshimi i bazuar se i pandehuri K.SH, ka kryer veprën penale “Prodhimi dhe vënia në qarkullim e artikujve të dëmshëm ushqimorë” nga neni 161 të KPRK-së, ku sipas hetimeve të Prokurorisë dhe të dhënave nga Policia e deri më tani rezulton që në restorantin e të dyshuarit si pasojë e konsumimit të ushqimeve janë helmuar mbi 100 persona”, thuhet në njoftim.
Numri i të helmuarve nga një lokal i ushqimit të shpejtë në Malishevë ka arritur në 145.
Kështu e ka konfirmuar për Teve1.info drejtori i Qendrës Kryesore Mjekësore Familjare në këtë komunë, Afrim Krasniqi.
“Ka arritur në 145, pjesa më e madhe janë mjekuar këtu dhe me pas janë liruar për në shtëpi, por ka edhe nga ata që janë dërguar në QKUK për trajtim të mëtutjeshëm. Pacientët kanë të vjellura, barkëqijtë, temperaturë dhe ethe”, ka bërë të ditur ai. /Teve1.info/
