Ministrja Hajdari është shprehur se është i rëndësishëm vetëdijesimi i shoqërisë, sidomos pas pandemisë dhe krizave aktuale, në riformësimin e mënyrës së të bërit biznes dhe ridizajnimin e sistemit prodhues në mënyrë që të jetë më efiçient dhe më i qëndrueshëm, duke respektuar standardet për shëndetin dhe mbrojtjen e konsumatorit.
Sipas një komunikate nga MINT, mbi temën e ri-gjenerimit dhe zhvillimit të bizneseve, thuhet se ministrja Hajdari ka potencuar se kalimi nga ekonomia tradicionale në ekonominë digjitale ka nevojë për zhvillimin e një ekosistemi inovativ, infrastrukturë ligjore, politikë fiskale dhe sistem arsimor efikas nga niveli fillor deri në atë universitar.
“Ministria e Industrisë, Ndërmarrësisë dhe Tregtisë përgjegjëse për politik bërjen dhe mbështetjen e bizneseve fillestare, ka për qëllim t’u japë më shumë hapësirë parqeve teknologjike industriale dhe në të ardhmen përmes Fondit të Inovacionit dhe Sipërmarrjes, t’u japë më shumë përkrahje bizneseve fillestare me ide kreative dhe potenciale për eksport” ka thënë Hajdari.
Inovacioni dhe transformimi digjital në fushën e industrisë dhe ndërmarrësisë është hap vendimtar, për krijimin e ekosistemit digjital me ekonomi të gjelbër, në zhvillimin e kapaciteteve gjithëpërfshirëse dhe njerëzore.