Presidentja e Kosovës, Vjosa Osmani, është takuar me gjeneralmajor Ozkan Ulutash, i cili mori detyrën e komandantit të KFOR-it.
Me këtë rast, Osmani e ka uruar për marrjen e detyrës së komandantit të KFOR-it.
Zyra e Presidentes bëri të ditur se në këtë takim u fol për koordinimin në përballjen ndaj kërcënimeve nga Serbia.
“Gjithashtu, Presidentja Osmani theksoi rëndësinë e koordinimit në përballjen me sukses ndaj sfidave e kërcënimeve të hapura nga Serbia që tentojnë të cenojnë sigurinë, stabilitetin dhe integritetin territorial të vendit, veçanërisht pas sulmit terrorist të 24 shtatorit në veri të vendit. Në këtë drejtim, Presidentja shprehu mirënjohjen për përforcimin e trupave të KFOR-it, të cilat po i përkrahin institucionet e Kosovës në patrullim të kufirit me Serbinë”.
“Nga ana e tij, Gjeneral Ulutash, shprehu mirënjohjen dhe falënderimin për pritjen nga ana e Presidentes Osmani, duke theksuar se do të bashkëpunoj ngushtë me Presidenten Osmani dhe të gjitha institucionet e tjera vendore për të realizuar përgjegjësinë e tij në shërbim të sigurisë dhe mbrojtjes së paqes dhe stabilitetit bazuar në mandatin e misionit të KFOR-it në Kosovë”, thuhet tutje në njoftim./teve1.info/
