E pas sulmit terrorist në veri të Kosovës, Kosova dhe Serbia ende nuk kanë një datë për kthim në dialog. E nëse i njëjti ndërpritet, kryetari i komunës së Preshevës, Shqiprim Arifi thotë se rrezikohen shqiptarët ne atë pjesë. Ai para disa ditëve i ka dërguar edhe letër zyrtare Qeverisë së Kosovës dhe është i gatshëm për takim.
24 shtatori ka alarmuar edhe shqiptarët që jetojnë në Serbi.
Kryetari i Komunës së Preshevës, Shqiprim Arifi ka thënë se një ngjarje e njëjtë si në veri, mund të përsëritet në Luginë të Preshevës.
Sipas tij, shqiptarët në Luginë janë më të ekspozuar ndaj rreziqeve.
Arifi i ka drejtuar edhe një letër zyrtare Qeverisë së Kosovës dhe thotë se nëse ka ftesë do të shkojë edhe në takim më kryeministrin kosovar.
E si komunitet shqiptar më të rrezikuar i sheh analisti politik nga Shqipëria, Ben Andoni.
Andoni thotë se për këtë pjesë s’ka interes as Prishtina dhe as Tirana.
Tëvë1 ka dërguar pyetje edhe në Qeverinë e Kosovës për këtë çështje, mirëpo të njëjtit nuk kanë kthyer përgjigje.
Pa përgjigje kanë qenë edhe nga BE-ja në pyetjen se nëse ka gjasa që të përfshihen shqiptarët e Luginës në dialogun Kosovë-Serbi.
