Deputeti i Vetëvendosjes, Agon Batusha, duke folur për procesin e dialogut Kosovë – Serbi, thotë se pala kosovare e ka momentin e fundit që të dialogë me ndërkombëtarët, jo me Serbinë.
Batusha, thotë se Kosovës i duhet një dialog multilateral, pa Serbinë, në mënyrë që të diskutohen interesat e Kosovës dhe ato të bashkësisë ndërkombëtare.
“Kosova e ka momentin e fundit që të dialogojë me ndërkombëtarët, jo me Serbinë. Të dialogojë me faktorët perëndimor demokratik siç janë Gjermania, Franca, Britania e Madhe dhe shtetet tjera si Italia, sidomos Shtetet e Bashkuara të Amerikës. Ne duhet një dialog bilateral ndoshta edhe multilateral me ta, pa Serbinë, për interesat e Kosovës dhe interesat e bashkësisë ndërkombëtare me Kosovën. Pra, raporti jonë me ta”, tha ai në emisionin “Ditari” në Tëvë1.
Deputeti i mazhorancës thotë se prioritet tani për tani në Kosovë është siguria.
“Ne e kemi çështje urgjence sigurinë e Republikës së Kosovës, 48 bazat ushtarake dhe policore që janë në kufi me Kosovën janë rrezik për Republikën e Kosovës, kjo u dëshmua më 24 shtator. Dy ditë para 24 shtatorit kanë filluar lëvizje e ushtrisë dhe policisë serbe në kufi me Kosovën duke e paralajmëruar se ky është skenar. Nuk mundet t’i ikë kësaj pune Vuçiq, sepse ka qenë skenar”, deklaroi Batusha.
Përfund, ai tha se Kosova kërkon nga aleatët sanksione për Serbinë.
“Sanksione, së pari për Serbinë, heqjen e sanksioneve për Kosovën, sepse janë të padrejta dhe të pabaza. Ne e kemi kryer punën tonë, moti e kemi thënë. Na është kërkuar të bëjmë deeskalimin, ne e kemi bërë, e kemi ulë praninë e policisë në objektet komunale, e kemi bërë bazën ligjore për zgjedhjet e parakohshme, pra institucionet e Kosovës e kanë bërë punën e vet”, shtoi Batusha./teve1.info/
