Pas 11 ditësh bllokadë, të mërkurën u hap për qarkullim. Në pikën kufitare në Bërnjak që lidh Kosovën me Serbinë filluan lëvizjen kamionët dhe veturat. Por, për ata që hynin kishte kontrolle më të rrepta veçanërisht tek veturat.
Teksa, çdo shofer i veturave u detyrua që simbolet shtetërore serbe t’i mbulojë me ngjitës. E shumë pak metra afër kësaj pike kufitare shihet ky ministacion i Policisë së Kosovës.
Aty u panë numër i madh i zyrtarëve policorë, kryesisht të Njësive Speciale.
E gjatë rrugës për në Zubin Potok, njësi policore u panë edhe në pika tjera.
Edhe te kjo vilë e ish-nënkryetarit të Listës Serbe, Milan Radoiçiq që u konfiskua u pa kjo autoblindë e Policisë. Situatë e qetë të mërkurën u pa edhe në fshatin Banjskë të Zveçanit ku mbeti i vrarë rreshteri i Policisë, Afrim Bunjaku.
Në një pikë statike në hyrje të fshatit po qëndrojnë specialët e Policisë. E në vendngjarje ende po vazhdojnë të qëndrojnë këta kamionë ku mbeti i vrarë rreshteri. Kurse, për dallim prej ditëve tjera, të mërkurën nuk u panë pjesëtarët e Njësisë Speciale Operative.
Ata u zëvendësuan me pjesëtarë të Njësisë së Reagimit të Shpejtë që po përkujdesen për ruajtjen e rendit të qetesisë. Kjo siç ka mësuar televizioni u bë për shkak të zvogëlimit të rrezikut në atë pjesë.
E në lartësi të Banjskës ende janë prezente shenjat se këtu ka qëndruar një grup terrorist. Kurse, pika kufitare në Jarinjë edhe gjatë së mërkurës ishte e mbyllur per qarkullim.