Pas ngjarjes tragjike në Banjskë të Zveçanit, institucionet e Kosovës kanë filluar tashmë hetimet. Në ndërkohë edhe prokuroria në Serbi ka paralajmëruar hetime për këtë rast. Mirëpo a është i mundur një bashkëpunim mes dy prokurorive, tregon kronika në vazhdim.
Prokuroria Speciale e Republikës së Kosovës ka nisur hetimet për sulmin në Banjskë.
Deri tash, kjo e fundit është në proces të mbledhjes së informatave dhe dëshmive në lidhje me këtë rast, që autoritetet e kanë cilësuar si sulm terrorist.
Bashkimi Evropian në anën tjetër, ka theksuar se Serbia e ka obligim të bashkëpunojë pa kushte.
Hetime për sulmin në Banjskë u paralajmëruan edhe nga Prokuroria e Serbisë, por nuk është e qartë nëse dy institucionet do të kenë bashkëpunim me njëra-tjetrën.
Ministria e Drejtësisë përmes një përgjigje elektronike ka treguar se do të procedoj një kërkesë ndaj Serbisë, përmes ndërmjetësuesve për ekstradimin e personave që morën pjesën në sulm.
“Sipas marrëveshjes, Përfaqësuesi Special i BE-së në Kosovë dhe Delegacioni i BE-së në Serbi, kanë ndërmjetësuar dhe ndërmjetësojnë për transmetimin e kërkesave për Ndihmë të Ndërsjellë Juridike Ndërkombëtare dhe përgjigjeve. Gjithashtu, Ministria e Drejtësisë e Republikës së Kosovës do të procedoj çdo kërkesë për ndihmë të ndërsjellë juridike në çështje penale”, thuhet në përgjigjen e MD-së.
Edhe avokati, Skënder Musa thotë se rrugë e ndërmjetme për bashkëpunim mund të bëhet vetëm përmes EULEX- it dhe UNMINK-ut.
Ndërkohë është Anton Nrecaj nga Instituti “Clard”, cili shprehet skeptik se pala serbe do të bashkëpunoj në këtë drejtim.
Më 24 shtator, një grup i armatosur terrorist sulmoi policinë e Kosovës në Banjskë të Zveçanit.
Për këtë sulm autoritetet kosovare akuzojnë udhëheqjen shtetërore të Serbisë se qëndron prapa tij.
