Kryeministri i Kosovës, Albin Kurti, i cili më 1 tetor 1997, ishte njëri nga organizatorët e protestës së studentëve të Universitetit të Prishtinës, ka thënë se kjo protestë “theu një heshtje dhe frikë të gjatë dhe popullit nisi t’i rikthehej guximi e dinjiteti”.
Ai në përkujtim të kësaj date ka bërë homazhe te varri i profesor Ejup Statovcit, bashkë me ish-studentë e pjesëmarrës në marshimin për liri.
“Profesor Statovci ishte udhëheqës e prijës bashkë me studentët dhe organizatën e tyre gjithëpërfshirëse, Unionin e Pavarur të Studentëve të Universitetit të Prishtinës – UPSUP. Studentët, nuk ishin vetëm. Vepra e kontributi i tij i jashtëzakonshëm na frymëzoi të gjithëve. Universiteti i Prishtinës u ringjall ndonëse nën okupim dhe u bë institucioni i cili udhëheqte me rezistencën e atëhershme”, ka shkruar Kurti.
Kryeminsitri ka thënë se përkujtuan edhe rektorin Zenel Kelmendi, i cili ndërroi jetë në gushtin e këtij viti.
“Ai ishte një udhëheqës i vendosur i Universitetit në vitet e para pas luftës, duke pasuar si rektor punën e profesor Statovcit dhe fuqizuar themelet e Universitetit të Prishtinës”, ka shkruar tutje Kurti në Facebook.
Kurti ka thënë se marshimi paqësor i studentëve më 1 tetor 1997 ishte për liri.
“Me 1 tetor 1997, studentët shprehën vullnetin e dëshirën për liri. Ne, marshuam paqësisht, për lirimin e hapësirave të ndaluara të kampusit universitar, drejt rrugës për arsim e edukim të lirë, të drejta të patjetërsueshme, liri e pavarësi. Nderim e përulësi për secilin që ka kontribuar, që guxoi e nuk qëndroi duarkryq kundrejt shtypjes, padrejtësisë e okupimit serb”, ka shkruar Kurti.
