Në takimin e djeshëm të presidentes Osmani me liderët e partive opozitare, ishte thënë se vendi ka nevojë për unifikim, në këto momente të vështira pas sulmit terrorist të dirigjuar nga Serbia. Por, analistët politikë theksojnë nevojën që edhe kryeministri Kurti të reflektojë dhe të ftojë opozitën në takim.
Zyra e Presidentes Vjosa Osmani, të mërkurën hapi dyert për tre liderët e partive opozitare të Kosovës, Memli Krasniqi, Lumir Abdixhiku dhe Ramush Haradinaj.
Pas sulmit terrorist ndaj Policisë së Kosovës më 24 shtator në veri të vendit, shefja e shtetit, në takime të ndara i njoftoi ata për gjendjen e sigurisë së vendit.
Andaj për njohësin e rrethanave politike, Visar Xani, një ftesë e ngjashme për takim me liderët opozitar do duhej të vinte edhe nga Kryeministri Albin Kurti.
Por analisti politik Bekim Kabashi sheh diçka tjetër, që sipas tij, është edhe më shqetësuese.
Sipas tij, çështja duhet të shtrohet edhe pse nuk ka takime mes presidentes Osmani dhe kryeministrit Kurti.
Takimi i fundit në mes kryeministrit Kurti me krerët e partive opozitar ishte më 8 nëntor të vitit të kaluar.