Ministri i Punëve të Brendshme i Kosovës, Xhelal Sveçla, ka thënë se për sulmin ndaj Policisë në Banjskë të Zveçanit po hetohet edhe mundësia e përfshirjes ruse.
Sceçla në një intervistë për “Associated Press”, thotë se hetuesit po shikojnë mbi provat nëse ka lidhje me Rusinë, si aleate e Serbisë, në sulmin e armatosur. Armët, pajisjet dhe dokumentet e kapura sugjerojnë se ka përfshirje ruse në sulmin.
“Ajo që e dimë sigurt është se ata erdhën nga Serbia”, ka thënë ministri.
“Disa nga ta janë serbë të Kosovës, që kanë dyshtetësi, kosovare e serbe, dhe që, sipas informatave të inteligjencës tonë, ishin trajnuar në kampet në Serbi”, tha ai.
Tutje, Sveçla ka thënë se kanë gjetur disa dokumente që shpien në dyshimin se ka pasur individë që kanë ardhur nga Rusia.
“Kemi gjetur disa dokumente që na shpien në dyshimin se ka pasur individë që kanë ardhur edhe nga Rusia”, ka shtuar Sveçla.
“Për pajisjet, kemi dëshmi, por për njerëzit mbetet ende vetëm dyshim”.
Presidenti i Serbisë, Aleksandar Vuçiq, ka mohuar pretendimet se Serbia ka qenë e përfshirë në përleshje, duke thënë se personat e armatosur ishin serbë vendas të Kosovës “të cilët nuk duan më t’i rezistojnë terrorit” të autoriteteve etnike shqiptare të Kosovës.
Polici i Kosovës, Afrim Bunjaku, u vra të dielën në Banjskë nga një grup i armatosur serbësh. Në aksionin pasues nga Policia e Kosovës u vranë tre sulmues. Tetë persona janë arrestuar, ndërsa katër nga ta u liruan në mungesë provash. Shumica e grupit ka ikur./teve1.info/
